曾任廉署調查主任嘅民主黨總幹事林卓廷，自從當選北區區議員後，再次重拾毛筆同街坊寫揮春。阿廷話，街坊要求佢寫得最多嘅，係「身體健康」同「學業進步」，但去到維園年宵檔時，就試過遇到一位50幾歲男士，要求佢寫「一生所愛，永世為奴」，佢忍唔住笑咗出嚟，惟有求助在場書法師傅幫手。
阿廷寫揮春叻，煮嘢食仲叻，佢同八方講自己係「滷水專家」，家藏一支自家炮製陳年滷水汁，阿廷噚日趁新年聚會，親自炮製咗滷水雞翼畀記者試食（圖），八方同行家食過都讚不絕口，阿廷仲話每次搬屋都一定要帶埋呢支滷水汁，而自己每月至少煮一次滷水嘢食，真係入得廚房。