「酒」逢知己千杯少！加拿大時間周四，小記以咖啡代酒，喺加拿大航空中心對面嘅餐廳，同nowTV兩位評述員丘雨勤（阿勤）、張丕德（Peter）暢談NBA全明星賽。
首先，我哋當然係討論邊個係下周日全明星賽東西岸對決嘅MVP啦。阿勤鬼馬咁反問：「你覺得邊個會贏到MVP？」小記話：「Kobe。」阿勤笑完後補充話：「大家都想Kobe贏！」當中有千言萬語，有睇NBA嘅球迷一定會明白。
湖人球星拜恩喺NBA征戰20季，五奪總冠軍，今次係最後一次打全明星賽，唔少人都認為其他球星可能會讓路。就算係「籃球博士」Peter都有呢個諗法，佢仲話雷霆後衞「二少」韋斯卜克（Russell Westbrook）同勇士嘅「咖喱仔」史堤芬居里到時都會識做，將個波交畀Kobe發揮。
咖喱仔三分賽冇得輸
之後話題轉到周六嘅全明星賽周末派對，焦點當然係三分賽，Peter立即表現風趣一面話：「有邊個認為咖喱仔衞冕唔到，真係『諗多咗』。」情況又確係咁喎，就算今年咖喱仔嘅對手唔弱，包括隊友K湯遜（Klay Thompson）同快艇射手列迪克（J.J. Redick），但當NBA每日Top 10經常出現咖喱仔喺三分線踏後幾步起手，甚至遠到半場都射得入，就知乜嘢叫冇得輸。