噚日有大埔網民突然話收到民建聯派發嘅人形「針包」，仲興奮到忍唔住即刻用，點解民記呢個「針包」咁受歡迎？原來人形「針包」繡咗「民建聯立法會議員譚耀宗」大名，有網民仲上載照片，「針包」上插咗十幾支大頭針，仲加多道符，搞到個「針包」成個降頭公仔咁款（圖）。
唔少網民都大讚民記今次設計正，有人話要頒「十大傑出藝術獎」，連白鴿黨副主席羅健熙都讚民記「非常體貼」！
八方立即問譚Sir點解咁搞嘢，佢澄清話嗰個並非針包而係香囊，造型係件衫，代表豐衣足食，仲話網民咁惡搞「冇意思」。
譚Sir黨友葉國謙話，自己就冇製作呢類小飾物，都係按傳統出啲揮春同利是封，對於譚Sir嘅遭遇，阿謙失笑話︰「作為政治人，隨時預咗一件好事會變成惡搞，不足為怪喇！」