話說昨日盧巧音（Candy）喺自己fb開咗個post，留言想搵用緊周柏豪代言嘅M巾用家，一齊討論下呢款衛生巾點解唔同咗。
咁有乜嘢唔同咗呢？睇睇Candy上載嗰張相就明，圖中有兩包同樣係周柏豪代言嗰隻M巾，左邊嗰包，Candy形容係「差啲嘅」，點差法？佢話:「厚咗，包裝差咗，字體大咗，同埋印得衰咗！請問應該點做？」
除咗包網上嘅分別，Candy仲好細心咁詳述埋拆開包裝紙嘅不同：「開張包裝紙嘅時候，左邊就包裝紙同入面嗰張膠紙分開搣；右邊就一開包裝紙，入面膠紙會一併整齊拉出。」
有用家驚歎Candy嘅觀察力，睇完佢個post先發現，咦，包裝真係唔同咗，即留言問Candy係咪買到假貨？佢回覆謂都懷疑自己買到假嘢：「應該係！左邊(即係差啲嗰隻)喺惠_買，右邊屈_ _買。」佢仲話覺得呢件事好需要正視，因為之前曾經有其他牌子嘅衛生巾曾經發現有蟲：「點都係second skin, 要正視！」
當然最多人留言講嘅，就係叫Candy打去俾代言人周柏豪問下個分別，而Candy就抵死咁話:「有諗過。」認真風趣。
其實Candy咁了解呢個品牌嘅產品，廣告商真係可以考慮下下次搵佢做代言人啦！