一年容易又到男生最煩的情人節，冇女友的煩冇人陪又要獨﹙毒﹚過，有女友的又要煩送咩禮物好。其實近年波鞋風大熱，女生都變鞋迷，買對波鞋做情人節禮物，自己買得開心D順氣D之餘，女友又收得開心，應該點都比買手飾買花來得化算。以下就有幾對唔錯的女鞋之選，巴打們不妨睇睇啱唔啱Feel。
AJ 12一向是大熱又公認靚仔的AJ鞋款，男裝的「Taxi」早已被大炒，今年將推出的「Flu game」亦已成不少鞋迷一大目標。今次襯情人節推出的白粉紅配色亦當然地冧死女，配色和鞋款都可說是冇得輸，不過要注意的是AJ 12鞋型屬好睇唔易著，男生有一定高度當然沒問題，但女生穿就容易著得又矮又腳粗，自問自己女友Carry唔到就要想清楚。
跑鞋款絕對比籃球鞋款易著易襯，adidas的Ultra Boost當然是又靚又舒服的首選，但已是上年款，加上靚色大多要捱炒價，未必化算。反而新近推出的PureBOOST X是不錯選擇，一來打正女裝旗號，配色多受女生喜愛；二來同是Boost底，舒適度有保證；三來價錢相對相宜又不用捱炒，抵玩。
Pump Fury一向是不少女生之選，有權相信香港街頭女生穿此鞋的比例比男生更多。一直已有不少攻女配色的Pump Fury在今年情人節再推「Valentine's Day」特別版，白底配上像染色的粉紅色，再加上大大個唇印和「XOXO」字樣，又靚又特別。
以經典鞋款Blaze of Glory為藍本，外型經典時尚兼備，配色上又有女生喜歡的鮮豔糖果色，但最最最重要的是……價錢夠平，$699有交易，而家去旺角買仲分分鐘有折，對手頭緊的巴打們來說，Puma Blaze絕對是好選擇。
又一大大熱鞋款，雖然黑色藍色一街都係，但今次以櫻花印花作鞋面，令新鮮感大增，粉藍底加粉紅櫻花又是女生必愛組合配色之一，若嫌太「女」亦可選黑白色版，同樣有櫻花圖案卻又低調得多。另外，跟Puma Blaze一樣，勝在夠平，$549有交易，留多個錢食餐好咪仲好！
記者：韓繼聰
