呢排世界足球好似圍住中國嚟轉咁，一、二月高價轉會嘅球星，大部份都係轉投中超球隊搵人仔；估唔到連英超「曼市雙雄」都為咗搵人仔，今夏會去中國上演曼市打吡友賽，曼城新任領隊哥迪奧拿同曼聯潛在新任領隊摩連奴到時可能再度交手。
或成哥帥摩佬「首戰」
曼城早前公佈咗，會喺中國北京同上海各踢一場友賽，據報每場收益高達350萬鎊（約4,000萬港元），認真和味；對手亦都有眉目，其中一場就係對曼聯，比賽城市未定，日子就可能係7月29或者30日。雖然比賽日子對曼聯係趕啲，因為紀念朗尼加盟12周年、喺奧脫福對愛華頓場友賽喺八月三日舉行，但搵錢緊要嘛。呢場曼市打吡另一焦點係領隊，曼城已經落實由前巴塞同現任拜仁教練哥迪奧拿今夏接手，友賽將會係佢第一次領軍；曼聯亦準備換領隊，摩連奴加盟嘅呼聲都好高，佢同哥帥前幾年已經喺歐聯同西甲打餐死，往績上哥帥就佔優，唔知今次摩佬可唔可以報番仇呢？
講開人仔，巴西同阿根廷都有國腳級人馬加盟中超球隊，2014年代表巴西出戰世界盃嘅前曼城前鋒祖奧（圖），就正式加盟江蘇蘇寧，同拉美利斯、阿歷士泰斯拿組成巴西鐵三角。法國《隊報》就報道，阿根廷前鋒拿維斯決定離開巴黎聖日耳門，轉投中超河北華夏幸福，年薪高達1.1億人民幣，點會唔動心？