年輕馬主陳志名下、苗禮德馬房的「由心出發」，上季4歲頭兩仗全勝，顯得潛力十足，其中一次更係負重磅下，仍擊敗極輕磅之「駕善」，而「駕善」其後攞到2冠2亞4季，更可反映「由心出發」實力之強。
可惜的是「由心出發」6月下旬因右前腿膝頭有碎骨，做過內窺鏡手術，因此需要休息超過半年，足足等到上月中先復出，角逐田草1400米，本來大冷門只係熱身性質，點知表現遠比預期好，拼入一席殿軍，僅負給頭馬「飛廉之子」個多馬位。
練馬師苗禮德表示，「由心出發」家陣健康好穩定，右膝患處絕無復發跡象，賽後更抵受得住辣操，特登安排本月初試一課泥閘，希望進一步谷起狀態，力求喺周日（14日）第九場再戰三班1400米，可以為馬主陳志贏番一場頭馬。苗禮德強調「由心出發」雖已五歲，但只跑過8次，仍然有好大進步空間，沙田C加3跑道向來利外疊後上馬，所以「由心出發」排13檔影響唔大，本身亦有輕磅優勢，相反兩匹主要對手「彩福」、「健康歡笑」負磅沉重，此消彼長之下，絕對有權突圍喎！