年年各大專院校喺農曆正月都輪住搞傳媒茶敍，等校長同記者拜個年，順便講吓未來大計。不過原本打頭陣下周一舉行嘅中大茶敍，竟然胎死腹中，真係大吉利是！
中大月初已經請各大傳媒去茶敍，點知八方噚日下晝收到中大電郵，內容話「鑑於近日發生的事件，大學認為現時並不適合舉辦傳媒新春茶敘慶祝新春」，寫到明取消，唔係改期喎，十年嚟第一次！
學生會質疑冇關心學生
八方即刻打去問何謂「近日發生的事件」？發言人先話係講緊旺角騷亂有多人受傷，校長沈祖堯好痛心，認為唔係適合團拜嘅心情。祖堯BB上年都有寫揮春送畀記者，今年卻連見都冇得見。冇計啦，被捕學生中包括中大三年級學生曾建恒，心情係會差啲，不過唔知祖堯BB係咪順便想避埋記者追問佢俾學生鬧爆一事。
點解八方有咁嘅聯想？因為中大學生會昨凌晨喺facebook貼咗篇《今天的沈祖堯，還會關心學生嗎？》，話中大喺衝突後兩日先發聲明係遲鈍，仲話被捕同學要畀成萬蚊保釋金，對冇收入嘅同學係好大負擔，「猶記起校長沈祖堯曾明言，視學生如子女，無論子女有沒有犯錯也會出手相救。」仲鬧中大含糊其辭，對警察暴力行為曖昧不清，寸爆祖堯BB，叫佢唔好再藏頭露尾，講明中大立場，包括對警方濫權表態、應承不會讓警方未有搜查令就搜學生宿舍，以及協助被捕同學。唔少人都留言讚好，話對沈祖堯失望。
李八方
mailto:[email protected]