【旅遊籽：假日散心】
行山友愛自然，揀女友有特別篩選技巧，庸脂俗粉、追逐名牌的港女，一律冇得留低。女友或老婆未必是運動健將，卻總是願意陪伴攀山越嶺，手牽手走過人生高山低谷。平時經常為準新人朋友攀上懸崖拍婚照的攀石教練，這天邀請妻子攀懸崖峭壁留倩影，沒華麗婚紗，只有中環半山美景與寒風，雖平凡但一樣放閃。另一名自稱毒L的九十後攝影師，寫潮文歌頌女友，介紹情侶必到山徑，以即影即有為愛情定格。
懸崖峭壁 執子之手
情陷夜中環，不一定聲色犬馬，難得有情人愛得轟轟烈烈，吊在約400米高的半山拍攝夜景婚紗照，名副其實是「半山將我包圍，誓死都一齊，壯觀得有如懸崖的婚禮」。要成就這壯舉，就要有位「不顧安危」的攝影師，他正是山藝兼攀石教練陸振宇（茶包），「拍攝攀石婚紗照，喺其他國家好普遍，我主要幫朋友影相。」他很多朋友都懂攀石，新手要想拍攝懸崖婚紗照都冇有怕，只要上幾堂惡補，力有不逮亦有教練用繩索將你拉上拉落，新娘穿長裙都不怕論盡。
替朋友拍攝得多，茶包反而沒與太太拍攝過懸崖婚紗照。「我哋從來冇試過一齊喺石牆上面睇中環靚景。」茶包太太方少玉（小玉）並非抱怨沒半張攀石婚照，反而沉醉於這個獨特時刻，兩公婆有意無意，齊齊穿藍色外衣從容擺pose，浪漫程度同樣冇得輸。高空的浪漫原來要付出代價，嬌小的跑步健將小玉爬高時忍不住發出哀號，「好大風，連嚿石都係凍嘅，好辛苦。」茶包反而鬆一口氣，不用當攝影師一身輕，享受被拍攝的樂趣。而他們三年前的婚紗照，是於共諧連理的印尼峇里島完成，不用帶繩索、安全帶、滑輪裝置，只需在海邊的岩石無憂無慮地擺pose，兩口子小小的身影，凸顯大自然的偉大，意境拍得住攀石婚紗照。
丟掉情侶手錶 頭燈引路惹意外疑雲
「喺山上面需要隊友支持，將自己生命交畀對方，要相信對方先能夠完成旅程。」茶包和小玉七年前修讀校外課程認識，大家都熱愛大自然，一同行山及攀石，彼此交託生命。一個攀高，一個於懸崖下防護，調校繩子鬆緊，有時角色互換。老公防護時，小玉特別放心，「佢知我幾時攰，知我怕昆蟲，石頭上面有毛毛蟲經過，會提我避開。」而她防護老公時，忙着弄安全扣，不忘深情望老公，突然拋出一句：「你有冇眼屎？」怕他上鏡不好看，真夠無微不至，十分趣致，茶包邊揉雙眼邊甜笑，這對夫婦果真「笑聲笑聲滿載溫馨，快樂發心內」。縱小心翼翼，兩人亦有蝦碌時，六年前他們在東龍島攀石，不小心丟了一隻綠色手錶，「唔記得邊個整跌，搵咗一個鐘都搵唔到，有啲可惜，係我哋第一次買嘅情侶錶。」小玉回憶道，可幸慨嘆過後依舊笑意盈盈。攀石攀出愛情，茶包說這份浪漫，沿路支援的兄弟亦功不可沒，他們亦享受和友人在岩上相聚，夜攀中環半山齊賞月。他們曾試過用頭燈照亮引路，卻被山下住客以為有人出意外，消防員到場才發現擺大烏龍，令他們啼笑皆非。
每次攀石，十居其九都是茶包扶助小玉，神山之旅除外。前年10月，他們前往馬來西亞沙巴的神山，身在約3,000米高山巔，茶包被高山反應困擾，「頭暈頭痛，淨係想瞓覺。」小玉反而精神奕奕，「平時教練好興講轉個彎到，鼓勵學員唔好放棄，呢次輪到我𠱁佢，求佢畀嘢我揹，發現我呢個老婆原來都有能力照顧老公。」執子之手，與子偕老，不論在平地或山嶺，高低起跌都互相扶持。
記者：梁慧琳
攝影：林栢鈞、楊錦文
編輯：陳漢榮
美術：孔文彬
部份圖片由受訪者提供