王晶同劉偉強炮製嘅《賭城風雲》系列拍到第3集，今次除咗有周潤發、劉德華、張學友同張家輝外，仲有劉嘉玲、李宇春等紅星演出，論卡士之強可以話係三集之冠，而《賭III》嘅香港票房過咗1,400萬，內地亦都過咗4億人民幣。
「完全沒有職業道德」
票房有成績，但《賭III》口碑就差到不得了，唔止香港有影評話套戲爛到超班，內地有戲院更喺微信發出道歉聲明，向睇過呢部戲觀眾道歉：「沒明白這一幫曾經的巨星，怎麼會如此不挑劇本。也搞不懂港片怎麼會淪落到如此地步。這部『電影』，完全是沒有職業道德的在騙錢。」
發出呢個道歉聲明嘅平凉中影星美國際影城係嚟自甘肅省嘅星美旗下戲院，佢哋鑑於近期對《賭III》嘅謾罵不斷而作出回應，呢份聲明仲話：「之後，該影片我們每日只會排一場，如果你實在想看，請你關注影訊。」不過佢哋就真心唔建議大家花錢去睇。呢份道歉聲明一出，喺內地影圈引起唔少議論，不過幾個鐘之後，份道歉聲明就俾人刪除咗，唔知係咪受到啲乜嘢壓力呢？
撰文：馮仁昭
