禮拜日(14日)沙田七草三泥共十場賽事，草地用C加3跑道作賽，雖然跑道狹窄，不過唔代表冇得追，睇番12月19日同一移欄亦係跑好地，當日七匹草地頭馬中，除了「揮闖」守貼欄包廂位贏馬之外，其餘都係留守中間或更後位置入直路，末段憑後勁反先對手勝出，所以不妨秤先靠追食糊嘅馬，放頭馬隨時行先死先！
今戰列陣馬中，第九場「彩福」上仗於田草C加3欄入Q，等番同一移欄再跑，必求補中。另外，第十場「比卡超」三次角逐田草田C加3欄獲兩冠一亞全入Q，窄場性能不用懷疑，復爭強項兼起用手風大順之蘇兆輝，有力打開今季勝利之門。
至於禮拜日三場泥地均跑1650米，最近就分別有「軍火」放頭及「相中有你」守好位贏同程，所以頭場「保證滿意」、四場「相中有你」及八場「競駿高飛」等擅跑泥地之前置馬，可優先留意。