環球股市勁動盪，就算避開港股A股，轉投歐、美、日股市都一樣瀨嘢。「寧買當頭起，莫買當頭跌」，呢個時間與其尋找個股低吸，不如專注避險。
傳統避險資產日圓同黃金呢排齊齊抽升，而另一樣少人提及，但同屬避險天堂嘅資產一樣飆升，呢樣叫環球政府債。政府債的確唔係一般散戶可以直接買到，不過美國其實設有多隻專門投資於政府債嘅ETF，近期表現仲非常靚仔。
同屬避險資產，點解唔買日圓或者黃金，要特登開個美股戶口買環球政府債ETF？因為政府債唔止有避險資金支持，如果歐央行或者日央行加大買債規模，政府債肯定會直接受惠。如果歐日選擇進一步負利率，上述國家嘅政府債一樣間接有支持。
美債ETF值得留意
所謂負利率，其實係指央行對銀行或金融機構存放喺央行嘅超額存款準備金徵收費用。原意係迫使銀行唔再將多餘嘅資金擺喺央行，而係拎去借貸，當銀行多咗錢可以借畀人，成個環境借貸容易咗，自然有助推動經濟增長。
可惜呢個只係教科書嘅理論，事關銀行唔一定要拎多餘嘅錢去借畀人，仲可以選擇為資金尋找其他低風險出路，例如係買政府債，故歐日實施負利率有機會利好當地政府債表現。
至於美國方面，暫時行負利率嘅機會唔大，但市場對於儲局今年暫緩加息嘅預期，相信並未完全反映喺美債之上，而當有關預期逐漸反映，美債ETF肯定仍有再上升空間。
所以同歐債ETF或日債ETF一樣，美債ETF亦值得留意。
El.
本欄逢周二、五刊出