市場憂慮國際銀行嘅安危，滙控（005）、渣打（2888）超低估值背後隱藏嘅危機，要浮上水面先？定係爆煲先揭曉？將會影響長遠股價生死存亡。傳統零售銀行一般只會賺、不會蝕，市賬率跌至低於一倍，係悲觀嘅情況，大眾金融（626）有形資產計算嘅市賬率0.86倍，高過滙控嘅0.8倍，當然係反映滙控存在大問題。
根據2015年6月底數據，滙控總資產2.37萬億美元，扣除無形資產之後，股東權益總額就係1,675億美元。如果滙控總資產當中有7%變成爛資產，滙控賬面值就變成零，再爛落去就變負資產。所以目前滙控市賬率0.8倍，係假設滙控資產裏面，存在唔少應爛而未撇賬嘅爛賬。
銀行生意槓桿高先能賺大錢，同時隱藏高風險、高回報、透明度低嘅業務，假設呢類高風險資產或財務責任達總資產7%，衰起上嚟可令滙控股東一個仙嘅資產都分唔到，估值看似平，理論上股價可無限平，故銀行股跌極都有。近年銀行股資產複雜度，高到連高層本身亦未能完全掌握，全世界嘅大銀行因乜估值咁低，危機完全係靠估、靠驚，越驚就越低。等於入咗間黑房，乜都睇唔到，但危險起上嚟原來會死人，買銀行股，變咗一件股價可以近乎total loss嘅玩意，而產品有實在需求嘅正當公司，估值就遠高於銀行股了。
晉佳
https://www.facebook.com/advanceguy1/