2月14日情人節就快到，仲未諗到去邊度約會好？八方畀個建議大家，嚟自韓國嘅大型光影藝術裝置「玫瑰燈海園」（Light Rose Garden），於情人節當晚6點亮燈，令中西區海濱長廊同添馬公園變成一片插滿2.5萬朵發光玫瑰嘅浪漫花海。
香港作為Light Rose Garden世界巡展首站，「種花」工程如火如荼（圖），策劃單位安排咗多個本地團體同婦女協助佈置，以便一對對小情人置身花海溫馨纏綿。Light Rose Garden周日至22日農曆元宵佳節，每晚6點亮燈，首階段率先喺中西區海濱長廊舉行，20日會移師至添馬公園。