摩連奴教曼聯嘅新聞日日有，陪住大家過新年，但內容差唔多，第一日就曼聯消息人士爆料，第二日就到摩佬身邊朋友披露，第三日仲話傳摩佬親口承認。噚日有啲新少少嘅報道話，摩佬喺曼聯嘅年薪會有1,500萬鎊，而向來吹水唔抹嘴嘅英國《每日星報》仲話摩佬今夏有三億鎊（約34億港元）擴軍，真係信不信由你！
千五萬鎊年薪少過哥帥
英國《太陽報》話，摩佬經理人佐治文迪斯同律師團隊已經喺倫敦，同曼聯傾緊啲合約細則，據報紅魔願意開出1,500萬鎊年薪畀摩佬，有成30萬鎊周薪，為期三年。不過，摩佬做唔到英超最高薪領隊，因為曼城下季請哥迪奧拿返嚟教，開出2,100萬鎊年薪，仲高過摩佬，不過摩佬今季教到車路士護級，曼聯壓吓價都正常嘅。至於《每日星報》就爆擴軍費，話摩佬今夏有三億鎊轉會費可以用。雖然曼聯噚日公佈嘅第二季業績幾靚仔，紅魔商業收入急升超過四成，舊年最後三個月嘅總收入高達1.34億鎊，盈利有1,860萬鎊，但如果一個夏天拎三億鎊出嚟買人都真係難以想像。
狂掃歐洲各大球星
英媒普遍認為桑馬達同費蘭尼都會被清走，而摩佬就會買史東斯及華拉尼返嚟加強後防。至於前線方面就鍾情大牌球星，尼馬、加里夫巴利同湯馬士梅拿都係目標。英媒吹出嚟嘅呢份名單，我求大俠就算係打《FM》，睇怕都要用修改器先買得晒。《每日郵報》話曼聯內部都人心惶惶，有職球員擔心摩佬會教到曼聯好似今季車仔咁，亦有指助教傑斯唔會再留隊，可能下季出去獨當一面教吓波。
講番啲近少少嘅嘢啦，曼聯周末會作客新特蘭，「黑貓」中場阿當莊臣將缺陣。阿當莊臣禮拜三出庭認咗「衰十一」，都嚇咗新特蘭一跳，領隊艾拿迪斯應該唔會派佢踢住。