【旅遊籽：假日散心】
「鍾意行山嘅女人，比淨係識得行街睇戲high tea嘅港女，真係冇得輸！」行山攝友「沙大大」去年7月寫的網絡潮文〈識揀女朋友，一定係揀個肯陪你行山既女人〉，滲透着對拜金港女的控訴。以為是給拍拖一年女友的JoJo愛的宣言，事實是JoJo經朋友傳閱才得知該潮文，靦腆地笑說：「文中提及啲女友特質都match我嘅。」這次行山之旅正是查探虛實的好時機。
平時愛走險徑的沙大大，這天專程挑選一條影相位多、風景優美，有山有海又易走的路線──龍蝦灣郊遊徑。在西貢大坳門出發前，這十分謹慎的兩口子，先點算裝備是否充足，JoJo於冬季也帶備毛巾幫男友抹汗，沙大大一臉甜蜜，感激女友之貼心，「咁井井有條嘅女人，第時頭家實唔使擔心。」沙大大之後耐心講解沿途景點，並謂：「大概行三個鐘咁上下，唔算太辛苦。」
登大嶺峒 用眼睛上地理課
好，旅程開始，兩口子手牽手上斜，邊行邊影相都不氣喘，更感激久違的周末好天氣。從大坳門經過大坑墩，沿龍蝦灣路行40分鐘後輕鬆到達291米高的大嶺峒，站在觀景台，視野360度環迴，清水灣、牛尾海、西貢海的海景盡收眼底，有──香港三尖之一的釣魚翁、飛鵝山、馬鞍山、雞公山，還有奇形怪狀的小島──遠看像小蘑菇的果洲群島、近在眼前的大癩痢等等，用眼睛上這堂地理課，一個下午也上不完。沙大大用山水靚景博美人展歡顏，不用買金買銀，儲錢不頭痕。他們站在附近一塊石頭上拍照，從旁看似快要跌下山崖，JoJo高呼：「唔怕！我好大膽，塊石頭好穩陣。」勇敢又易滿足，果然娶得過。餓了，沙大大拿出芝腿治一同享用，平凡也滋味。兩人更會在山上看書打發時間，女的愛心靈治癒小品，男的愛網絡作家小說。靜完再動，從大嶺峒落山步行約半小時至龍蝦灣風箏場，兩口子相依偎，靜靜地看船隻匆匆駛過，山上俯視的小島彷彿變大了。這裏更是電影及電視劇熱門取景地，包括《蓋世豪俠》、《赤沙印記@四葉草2》、《失戀急讓》等，各位情侶可在此盡情影放閃相。
上大金鐘黑面 影相耍花槍
「鍾意行山嘅女人，體力好，身體好，即係捱得苦。」沙大大和JoJo的愛情故事，一切從郊遊開始，拍拖三部曲：行街、睇戲、食飯，不是他們那杯茶。JoJo平時都有跑步，受男友影響行山，得男友盛讚，「三年前認識佢，同佢行荔枝窩去到吊燈籠，又斜又難行，佢都冇喘過氣呀。」不過始終是女生，這位肯吃苦的女友也有撐不住之時，JoJo：「舊年11月行馬鞍山昂平，佢明明話着拖鞋都行到，我着平底鞋，點知要行上536米高嘅大金鐘，嗰日又熱又曬，腳痛咪黑佢面囉。」心痛的沙大大再道歉：「係我疏忽，唔夠細心。」男士不夠細心不打緊，懂得拍攝靚相可以搭夠。JoJo三年前與沙大大見面，已被他的拍照技術吸引，除了當男友的「影后」，她亦想學習攝影，「得我一個影相好孤獨嘛，行山順便實習。」沙大大欣賞「學生」女友的勤力，也不忘提點，「成日影到我斜咗，斬咗我個頭。」講到恐怖片一般，耍耍花槍罷了。沙大大非常識做，去年10月更送了即影即有相機作女友生日禮物，「拍攝即影即有相嗰份期待，一般相機畀唔到。」 摘下懷念，記住美妙，走過萬水千山，身邊的那位始終如一。暫未能尋獲不要緊，緣份終有一天走近。
大坳門行山之旅路線
路程：約6.5公里
需時：約2.5至3小時
補給：大坳門茶水亭，可購買乾糧、麵食及風箏等
交通：鑽石山荷里活廣場乘九巴91號，大坳門站下車
沙大大潮文： http://sadaai.blogspot.hk/2015/07/blog-post.html
記者：梁慧琳
攝影：林栢鈞、楊錦文
編輯：陳漢榮
美術：孔文彬
部份圖片由受訪者提供