民建聯立法會議員葛珮帆昨同記者團拜，唔少記者留意到佢身後嘅揮春字體相當特別（圖），佢話呢手自創「帆」體字前後「苦練咗九年」，主要練「福」、「大吉」同「招財進寶」三款，並只會寫喺方形揮春紅紙。佢話「帆」體字特色係肥嘟嘟，聲稱唔少街坊都好鍾意喎，往年派咗5,000張，「反應好到欲罷不能」。至於今年，佢慨嘆要留立法會反拉布，令佢產量大減。仲話開會時，喺網上見到拉布議員新同盟范國威落區寫揮春，令佢好激氣，覺得泛民拉布其實係想阻建制派落區寫揮春喎！