【本報訊】「全香港最政治冷感嘅人，都喺晒中環返工！」在外資公司從事金融業的陳漢輝也是中環上班族，卻在冷感中尋回熱度，傘運後與同業籌組「思言財雋」，倡議改革立法會金融界及金融服務界的選民基礎，擴至約5萬從業員亦有票投。提起業界代表吳亮星與張華峰，外界記得的或只有可笑的表現，召集人葉旨崢直指：「我諗大家都忍夠嘞！」
記者：許偉賢
吳亮星與張華峰任內笑料百出，令業界既驚且怒，現為思言財雋發言人、45歲的陳漢輝強調，倡議改革並非針對兩人，「𠵱家嘅制度好荒謬、好扭曲；一日唔改善，選出嚟嘅人都係會人治」，更指此制度下「好人都變壞人」，因兩界別合共只約有700個公司團體選民，「（立會代表）根本唔使向業界交代……佢哋只係聽到老闆嘅聲音。」
金融界政治冷感，業內人陳漢輝不否認，從擺街站派傳單的反應可見一斑，但他認為：「有時或者係（同業）根本覺得係理唔到（政治），所以寧願搵多啲時間搵真銀。」眼見香港原有美好制度被蠶食，他相信有些人已覺醒，而中央就普選落閘，個人認定是時候站出來，由自己範疇為香港尋回正道：「我唔想有一日小朋友會問我：Daddy，你後生時做過啲乜？而我會話：其實我乜都冇做過㗎！」
現只有老闆董事可投票
思言財雋建議放寬兩組別的選民資格，至按照金管局及證監會相關名冊內的5萬名從業員；去年中成立後，至今約有十幾名成員，包括33歲的召集人葉旨崢。「中央（否決普選）令我好失望，正正係咁令我覺得要盡一分力」；失望之時，立會內兩代表均令他失笑，「如果功能組別係要維護業界利益，佢哋係做唔到；如果闊啲睇係要維護香港市民嘅權利，佢哋當然亦做唔到啦！大家記得嘅只係乜叫飲鉛水、乜叫洗頭艇、乜嘢人被呃錢……我諗大家都忍夠嘞！」
葉旨崢強調：「𠵱家呢兩個議員唔代表我哋，都係個制度嘅問題，因為只係有老闆董事去投票，從業員根本冇得投，佢哋亦唔會代表到港人利益。」他承認業界向來「悶聲發大財」，少理政治不愛表態，但他會持續推動業界積極參與，希望業界明白制度若不變，往後的立會代表亦只會如此，爭取業界票成個人票的網上聯署已經啟動（ https://docs.google.com/forms/d/1qchYIjndcelKdFhqpMnpYxjBDxRzvw-FXKx4XmQRE-8/viewform?c=0&w=1 ）。即將升任父親的葉旨崢說：「如果我哋𠵱家唔做啲嘢，下一代點生活？」