呂健威馬房最高分馬、女馬主溫佩珊愛駒「幸運如意」將於周日(14日)角逐第七場二班草地1200米，威哥表示以此駒評102分之高，足夠入選四歲馬2000米一級賽打吡大賽有餘，不過上場增程角逐經典一哩賽，考驗馬兒的長力，結果只得全無威脅之殿軍，證明隻馬短優於長，所以今仗決定走回頭路，回爭最首本的田草1200米，希望可以收復失地贏番場。
呂健威說：「『幸運如意』是匹忠心準繩好馬，我非常珍惜牠，由於牠正值四歲，先前為佢報名打吡大賽很合理，不過始終要配合馬匹性能，上場初跑1600米經典一哩賽，守好位下末段衝落反應一般，相信佢冇乜長力，所以我哋冇為佢報1800米香港經典盃，亦已決定退出打吡。不過今仗縮回爭1200米，卻對佢有相當期望。」
「幸運如意」可以話係田草1200米專家，4戰得3冠1亞，亞軍一役只輸畀現評110分之「首飾太陽」，可見厲害。
睇番另一明星馬「澳斯卡」，喺經典一哩賽只得第五名，廐主蔡約翰即變招，唔報1800米香港經典盃，縮程爭番勝途年初三1400米賀年盃，結果成功突圍捧盃，「幸運如意」嘅情況同「澳斯卡」差唔多，今仗大有機會回復勁旅本色。