周日(14日)沙田賽事，其中一個話題，當然是48歲老將史科菲來港客串一天，屆時將與兒子史卓豐連場陣上交鋒，亦是香港職業賽馬史上，首次有父子騎師同場比拼。
史卓豐周日騎足10場，史科菲亦有九匹座騎，除了第七場坐冷板，其餘場場都會同阿仔砌過。兩人最有機會串Ｑ，肯定係第五場四班1000米，史科菲策沈廐「港林飛魚」，隻馬正係佢介紹給馬主、練馬師引入來港，在港一出由史卓豐贏1000米直路賽，實力及速度俱備，史科菲肯定熟悉隻馬性能，本月初更試一課大閘勝出，谷到狀態靚一靚先等今場出擊，戰意十足。同場史卓豐騎「精益旅程」，上仗亦喺直路賽後上第二，大有進步，呢條父子騎師Ｑ真係諗得過。
仲有第九場三班1400米，史科菲嘅「哥哥仔」在港兩戰得一季一殿，已熱夠身兼試準，今仗排3檔當然係機會馬。而同場史卓豐夥拍「誠信寶駒」上陣，隻馬曾喺同程1400米贏過後來勝出一班賽嘅「貳寶」。「誠信寶駒」上仗所負不遠狀態有水準，抽到1檔梗係唔可以睇小啦。