梁振英咬牙切齒「定性」二八旺角警民衝突為暴亂時，維基百科率先確認外國傳媒的大標題：fishball revolution。魚蛋革命，呵呵呵，比另一批鬼佬記者形容的fishball riot更騎呢搞嘢。魚蛋，不是魚丸子，走鬼魚蛋檔新年流流被食環趕絕後，子彈就出場了。兩粒子彈，響徹大年初二凌晨時分的山東街，真是百年不遇，激過結霜小冰粒的大帽山！
魚蛋革命貼題，「磚頭運動」也到位。擲磚，死得人，警隊一哥說的。但擲磚還拖者，也有防暴隊呀，以暴易暴？以磚還磚？真是義氣到爆！事後睇片，交警被群眾圍攻，乃係因為，被警隊自己友放飛機！交警走下鐵馬，跟差佬除下速龍隊制服後，一樣係麻甩男一名，叫從未見過砵蘭街黑暗帝國的交警怎麼控制騷動的魚蛋？WTF，點解上頭不肯火速增援，係咪想交警背黑鑊？開槍差大哥心忖，以彈博蛋，盡地一煲，愈亂對梁振英愈有利，開槍哥，有勞了。
上任以來首次在港度歲的梁君，為這齣夾啱timing的「魚蛋風雲」下了影評：暴亂！暴君與暴亂，冤冤相暴，有蛋抑或魚先？懂了吧。