周星馳套新片《美人魚》喺賀歲檔上映，不過同上次《西遊‧降魔篇》一樣，只做導演，連過鏡都冇，搞到一班fans好失望，有網民仲留言問點解星爺啲戲好似冇以前咁好笑。
大家估估吓之前，要先搞清楚，就係如果咁易畀我哋估到點解嘅，佢就唔係星爺啦！坊間普遍有三個說法：一，因為佢冇份演；二，係劇本唔得；三，就係啲笑位係拍畀內地人睇，而內地人笑點又特別低，所以求其出兩成力，佢哋已經收貨。嗱，星爺點解唔演，就只有佢自己知，唔通中咗「七傷拳」、「化骨綿掌」又要話你聽？劇本嚟講呢，就如星爺話齋，創作嘅嘢好主觀嘅。至於你話星爺只係照顧內地市場，咁又似乎武斷咗啲，你估真係秒秒鐘幾廿萬上落咩，當中捱咗幾多苦同行咗幾多冤枉路，都係嗰句，唔通又要話你聽？
講到尾，大家都係睇星爺啲電影大，學佢嘅對白，同跟佢個look。套黎明嗰句，鍾意就鍾意，唔鍾意就唔鍾意，覺得星爺近排啲戲唔好笑，咪睇番以前嘅笑餐飽囉！