香港裁縫業遠近馳名，不少歐美遊客甚至將身訂造西裝列入行程。惟隨老一輩因年紀老邁退休，有經驗師傅已買少見少。有本地西裝店研發立體掃瞄系統，半分鐘即可製成全身3D模型，方便裁縫隨時比對之餘，亦減低因經驗不足造成的尺寸差異，令訂造西裝品質更一致。但有入行逾50年手工旗袍師傅稱，親身觀察客人體態如「有高低膊、寒背」，比尺寸準確更重要，「我只要6個數字，其他全部自己因」。
記者 佘錦洪
再「麻甩」的男人，總要有一套筆挺貼服的西裝傍身。西裝店Gay Giano負責人李諾軒（Matthew）本身從事時裝生意，一直看好訂造西裝市場，「你唔需要迮咁多貨，慳返存倉租金」，但因專業裁縫不足一度卻步，「本地老師傅唔多，每個又有唔同手法，如果要做大擴張，點樣令兩間舖都係一致呢？呢度有困難」。
年前Matthew偶然接觸到立體掃瞄設備，發現可解決不同師傅因技術及經驗導致的差異，於是著手投資開發全新掃瞄系統，前後前後共花8個月、投入7位數字資金。因度身數據最終要交由裁縫落手製作，他指最大難度是與老師傅溝通，一邊要解釋新科技不會取代他們的地位，一邊要找出最適合的應用方法，笑稱「淨係氹佢哋試用都搞咗好耐」。
Matthew指顧客要完成度身程序簡單，只需換上店內提供的即棄緊身衣物，站於度身房的指定位置，前後共14台紅外線鏡頭即會進行全身掃瞄，30秒後自動輸出仔細的3D模型，無需用量尺，「一嚟唔洗咁尷尬，二嚟店員可以集中返喺款式等嘅溝通上面」。
習慣新系統以後，Matthew稱裁縫們認為方便製作流程，「有咩唔啱可以即刻對返個Model，客人唔喺度都可以度到身」。他指有中東、美國投資者正與他們接洽，日後或於海外設立分店，下一步會研究在模型模擬布料材質，「以後度完身馬上就見到件衫嘅效果」。
科技發展一日千里，但有些傳統卻是五十年如一日。15歲隨親戚由江蘇來港拜師學藝製作旗袍，現年68歲的殷家萬一做就是50年。已屆退休年齡的他每日在佐敦寶靈商場的舖位中，一針一線縫出件件手工精美旗袍。舖位狹窄，一邊則堆滿客人帶來的布料，另一邊放滿用來為布料裙邊的碎料，連放椅子位置都欠奉，下午一時開門站到晚上七時，「企慣咗唔攰嘅，唔企用唔到力，搭車咪坐吓囉」。
看着訂單上的手寫打碼字，殷家萬主動問：「你睇唔睇得明？」桌上面的熟銅製漿糊刀、刻有唐呎皮軟尺，件件都是古董，「而家都冇人用，有錢都買唔返，之前跌咗把尺，呢個都係求人讓畀我」。
殷家萬表示，當年因戰亂不少有錢人走難來港，「就算要申請去外國都要幾年，啲阿太全部要做新衫」，帶動製作旗袍市場。但時移勢易，現時旗袍需求低，只有上年紀或喜慶時候會穿，學師時間長但賺錢卻不多，懂手工旗袍的裁縫師傅買少見少，「個個都退晒休唔做啦」。
要造出一件旗袍，熟手如殷家萬都要花30至45日。殷家萬稱度身僅需要度上胸、小腰、坐圍、領口、手臂、手長共6個位置，「其他全部自己因就得，做得熟就知道要幾多」。若有科技幫手製成立體模型會否更佳？他稱自己不懂電腦，但指造衫最重還要留意客人體態，「有無肚腩、高低膊、係咪寒背全部都要寫低，咁先可以幫佢造到啱嘅衫」。
殷家萬每周會到裁縫中心教授一節旗袍製作，但一門手藝至今仍未覓得傳人，亦無打算收學徒，「失傳咪失傳囉，一雞死一雞嗚」。他指時代會進步，衣着文化會隨之改變，即使是旗袍都有不同的表現方式，「而家有啲上身係旗袍領，下面係其他啲裙擺，呢啲留返畀啲後生去發揮啦」。