韓國演員宋一國嘅三胞胎囝囝大韓、民國、萬歲，憑綜藝節目《超人回來了》而獲得好高嘅人氣，雖然宋一國一家已經告別節目，但三胞胎熱潮依然未減。
男團帝國之子成員光熙日前就喺Instagram上載咗同民國、萬歲嘅合照，仲大讚三胞胎可愛。相入面光熙右手攬住萬歲、左手攬住民國，笑得好開心，其中萬歲八二分界嘅髮型非常引人注意，令萬歲睇起嚟man咗，不過一樣都係咁得意。
有網民就話「點解唔見大韓嘅？」、「好想見埋大韓」等，不過一向留意開節目嘅觀眾都知大韓比較怕醜，可能係基於呢個原因，大韓先冇同光熙一齊影相。但重點係，點解光熙會同「民國BB」佢地影相？唔通三胞胎準備演出其他新節目？