金銀業貿易場亦係噚日年初四開巿，候補理監事兼第一金嘅行政總裁（CEO）蘇裕斌今年冧莊，第二年喺開巿儀式上扮財神，佢笑住話，係理事長陳尚智「欽點」要佢繼續扮財神㗎！
其實陳尚智嘅決定都相當英明，蘇裕斌有番咁上下身形，新年流流見到呢位肥嘟嘟、望落夠晒福氣嘅財神爺，發財感覺自然來。
派元寶朱古力
今年理事長陳尚智照例有派開工利是畀大家，跟往年一樣係派100大元，而財神爺就只係派元寶朱古力，冇派利是。雖然冇得𢭃財神利是，但係場內員工都依舊相當高興，爭住同財神爺影相，想一沾新年福氣！
唔講唔知，金銀業貿易場位於上環一幢商廈，開市儀式後，蘇裕斌繼續以財神扮相，走去附近嘅商舖跟一班店主拜年影合照。
其中一間經營超過60年、賣茶葉嘅老闆話，以往每逢農曆新年開巿後，貿易場都會派人同佢哋傾兩句偈，祝福佢哋嚟緊一年有好生意，可以互相關照，認真有人情味。