踏入猴年，屬猴人士犯太歲，流年運程停滯甚至倒退，容易做錯決定。嗱！以上我都係上網聽某高人同某風水師講㗎咋，唔準唔好拆我招牌。
1980年庚申年出生嘅球員，不經不覺都36歲，坦白講除咗門將位置，好多已經到水尾。以往離開英超，好多都到美職聯搵多轉美金，貪語言、生活文化差異唔大，容易適應；洛杉磯銀河孖寶謝拉特同羅比堅尼，都屬於80年老猴，不過佢哋選擇去美國又有冇錯呢？
特別係謝拉特，英超欠呢位神奇隊長一個冠軍，估唔到連美職聯都係；上季首度幫銀河踢美職聯，竟然淘汰圈已經出局，真係慘慘豬。雖然謝四講明踢埋今季都退休，利物浦都準備好教練位畀佢，當做長糧咁，不過以佢嘅級數，去次級聯賽踢多幾年都綽綽有餘。
今時今日搵美金已經唔馨香，搵人仔先至係醒，睇吓一月轉會市場，中超簡直撐起半邊天。習總一聲令下，某特區首長牙牙學語講一帶一路，中超都至少一隊一星，謝雲奴、積臣馬天尼斯、阿歷士泰斯拿，既踢歐洲頂級聯賽又踢歐聯，都嚟中超搵食；以謝拉特水準，而且唔使轉會費，只要佢老人家肯，中超唔少過10隊球隊想搵佢啦。
不過咁，謝拉特以往喺利物浦享盡榮譽，加上廣告代言收入，投資又有道，身家唔會少，要搵佢除咗錢，生活質素都好緊要。係人都知謝拉特係好老公好老竇，今時今日中國各式各樣國際學校有齊，要安排佢囡囡享受好教育唔難；當然啦，空氣、飲食問題都令外援有戒心，不過裝多幾部空氣清新機，淨係食進口食品，有錢就任性，有錢就冇問題啦。
文：牽牛