環球股市出現咁大動盪，除咗因為大家驚中國走資然後資本賬封鎖之外，日本實施新負利率政策，然後美國亦就短期國債負利率嚟幫銀行做一次「走火警」，都做成衝擊波推低股市。美國呢次意料之外嘅走火警令到美元走弱，日圓滙價搶升，日股跌到四腳朝天。情況就好似2011年「311」日本大地震，地震完之後，再嚟個海嘯，比起地震更具殺傷力。
資本賬鎖國對於中國嚟講，有機會阻止內地金融體系即時崩潰，但係經濟長期低迷在所難免，奢侈品需求將會逐漸減少，進而拖累到其他國家嘅經濟表現，各國急忙兼失序地進行各項貨幣政策，結果係令到滙市大亂，美滙指數急跌，圓滙急升，成為令股市大跌其中一項主因。由2009至2015年，各個大國嘅寬鬆政策有序進行，先有美國QE、然後歐洲、日本跟風，中國近7年M2爆升超過兩倍，但人民幣資本賬未大幅度走出去，環球金融體系一直相安無事。
今年日本負利率後美國爭住走火警，上演貨幣政策撞車，事件有兩種發展。第一，各國感受到貨幣政策失序所帶嚟嘅後果，回復固有秩序，令資本市場震盪減輕；第二，各國鬥貶值令金融體系失序，股市急跌。當然第一個劇本機會較大。不過撞車一幕顯示各國經濟衰退嘅潛在風險已火燒眼眉，前景不明朗，轉機出現前，有反彈、冇升幅係常態。
晉佳
https://www.facebook.com/advanceguy1/