經民聯噚日趁大年初三出動，去紅磡同街坊拜年，派朱古力金幣應吓節。八方記得上年經民聯派出噸位十足嘅金融服務界議員張華峰化身脹爆財神，不過今年就唔見張華峰，惟有由細一個碼嘅盧偉國頂住先，佢仲自備色士風，即場吹奏《財神到》、《歡樂年年》等賀年歌曲。而上年話扮「何仙姑」最終甩底嘅梁美芬，噚日就扮「祿星」喇。
佢哋大合照時手持用簡體字寫嘅「盡快剪布」揮春影相，之前盧偉國主持工務小組、審議高鐵追加撥款時圖剪布，但最終被泛民力阻剪唔成，政府就唔理程序公義，將撥款申請直接交予財委會審議。八方套用前立法局主席黃宏發一句「主席係冇權剪布」，主持會議都係跟番議事規則啦！