里約熱內盧奧運仲有半年左右就展開，英國跳水隊獎牌希望戴利近排忙裏偷閒，拍片介紹吓點樣先有健康生活。21歲嘅戴利喺片中介紹檸檬、咖啡豆、麵包同雞蛋等食物有咩好處，但佢硬係要赤裸上身，慌死人哋唔知佢有兩條人魚線、兩塊雞扒同六嚿朱古力。咁都未算，見佢用手瓜夾住檸檬（圖），又浸咖啡浴，真係有啲嘔心同浪費。難怪佢啲片彈多過讚，英國網民就插佢根本喺度賣肉，同健康生活完全冇關。