猴年第一篇《咖喱牛腩》，先祝大家猴年快樂！球壇中有唔少猴年出世嘅球員，有啲24歲，有啲36歲，至於12歲嗰啲就恕我同牽牛兄孤陋寡聞嘞。小弟幾鍾意曼聯中場連格，因為夠平凡同勵志。
連格今年底就24歲，如果同尼馬、馬里奧葛斯呢啲同齡人比，佢𠵱家嘅成就真係差一截。但尼馬嗰啲天資聰敏、一帆風順，故事好似小說咁，真係有啲離地；相反，連格呢隻有起有跌，終於捱出頭來，就有親切感好多。費格遜臨退休嗰陣，連格都開始踢吓曼聯啲季前熱身賽，但球季一開就消失。睇咗曼聯咁多年，都見過唔少呢啲熱身賽新星，每年暑假出一出鏡，之後不知不覺咁離開咗。小弟原本都以為連格係呢類，但點知佢慢慢踢上正選。
問我連格有咩優點？佢傳球、射門、盤扭樣樣都可以，但又稱唔上勁，要讚佢的話，真係得勤力同肯跑。不過，曼聯或者任何球隊都需要呢種綠葉球員，安東尼馬迪爾、迪比、桑馬達呢啲身價用千萬鎊計嘅當然係陣中紅花，但佢哋防守效率唔高，有時會等波到，有啲大牌脾氣；如果個個都係咁，前場就冇人做無球跑動接應，要防守嗰陣亦唔夠人使。連格嘅未來定位可以參考名宿朴智星，你唔好旨意星仔可以一己之力幫球隊贏波，但重要比賽冇咗佢，總係差咗啲嘢。
小弟期望路爾斯華倫西亞快啲復出，踢番右閘，華西同連格嘅右路組合應該會幾夾，同樣係攻守兼備，跑動範圍大，又會互相補位。同埋，曼聯近年越嚟越少根正苗紅嘅青訓踢上正選，希望連格可以將紅魔青訓嘅靈魂傳承落去。
文：咖喱