呢邊廂有利物浦球迷抗議球會加票價，估唔到喺周二嘅德國盃出現同樣情況，而遭球迷抗議嘅多蒙特仲可能因此而醒一醒，結果順利以3:1擊敗主場嘅史特加。話說喺頭20分鐘，作客嘅多蒙特球迷都冇現身，喺客隊球迷嘅座位上只係有一條寫住：「足球係應該負擔得起嘅！」橫額，原來蜜蜂兵團球迷抗議要畀30鎊（約440港元）嚟睇德盃。之後，多蒙特嘅球迷終於入場，而當時嘅比賽係1:1，不過，多蒙特球迷入場之後就即刻向球場掟網球抗議（圖），搞到比賽都要停咗一陣。喺抗議事件後，蜜蜂兵團就表現醒神，最後以3:1贏咗。