初四啟市，開工大吉！過年幾日假期，好多人笑唔出，初一食魚蛋可能誤中流彈，初二睇煙花可能被大媽打……真係令人O晒嘴！OK，唔講時事，講財經。踏入猴年，以為熊運去，猴（好）運來，點知遇着頑猴鬧股市，雖然中港放假，但外圍大冧市，同樣令人O晒嘴！
經濟前景憂慮升溫，環球股市見拋售潮，避險情緒高漲，資金湧入債市。港股在美國掛牌的ADR捱沽，相對上周五恒指收19288，累積下跌超過500點；黑期（新加坡港股期貨）亦一度低見18486，較港低水802點。睇嚟港股今日幾難紅盤高收，唔爆股災已算大奇蹟日！
我的愛股之一滙豐控股（005），外圍股價失守50元大關，倫敦股價昨晚早段折算報49.8港元，較本港上周五收市價52.35元低5%；ADR折算報49.3元，較港低3.05元或5.8%。我係用short put滙控2月期權方式，收期權金等接貨，並估計滙控2月22日公佈2015年全年業績時，會跟足舊年派1.55元末期息，若果有乜唔對路，而期權金仍有賺，我會先行平倉，以免賺息蝕價。上周跟大家提過的對沖基金經理Paul Tudor Jones（CNBC交易員排名榜第二位，僅次於索羅斯）講過，交易中最重要係防守，唔係進攻。
環球資本市場熊蹤處處，除了股市，商品市場亦腳軟。隔晚紐約期油再瀉5.9%，收報27.94美元，已連跌4日，今年以來跌了兩成半，由2014年6月今輪熊市開始計更跌了近七成半。本來美國加息預期已降溫，但上周五公佈的就業數據一好一壞，失業率創8年新低，但職位增長卻低過預期，令息口走向不明朗，不利股市。
大市回穩吼中海外
外圍不靖，更要冷靜；市況不就，最好忍手。想趁低撈貨建倉要三思，操盤時唔好急於重倉某一股份，股市築底往往唔係一氣呵成，通常會反覆波動；資金亦要合理分配，一般嚟講，建倉資金大約三分一，不宜超過一半，亦唔使一次過投入，可分注逢低吸納。猴年可留意下內房股，尤其龍頭中國海外（688），阿爺畀晒貼士，政策力䇛內房，上周就下調樓按首期付款比例，以助樓市去庫存，預計二線城市發展商最受惠。大摩指中海外資產價值中，二線城市物業佔55%，係該行覆蓋的內房股中佔比最高。中海外股價年初起下跌，在20.45元附近見短期支持，現價22.05元，宜候大市回穩才入市。
割柑人
本欄逢周四刊出