本月尾會同曼城爭英聯盃冠軍嘅利物浦，大年初二作客韋斯咸進行英足盃第四圈重賽，點知俾主隊後衞奧邦拿入絕殺球，加時慘輸1:2出局，今季盃賽雙冠夢碎。
有高路普割完盲腸返嚟領軍嘅利記，雖然有菲臘比古天奴同米洛列特等主力擔正，但巴特史密夫等小將都有份落場，所以唔算強陣。完半場前佢哋俾米查利安東尼奧攻入，不過古仔喺換邊後三分鐘就扳成1:1，令比賽進入加時。加時踢咗30分鐘都冇入波，點知奧邦拿喺補時一分鐘頂入絕殺球，將利記踢出局。
利記因票價貴到77鎊而搞到滿城風雨，佢哋球迷上場聯賽喺77分鐘提早離場抗議，仲俾自己粉絲插用呢個價錢睇占士米拿同軒仔簡直係人都癲，球會高層事後表示會檢討票價；而其他英超球會包括曼聯、水晶宮同埋紐卡素等，見利記球迷反應咁大，隨即宣佈喺16/17球季聯賽唔會加票價。講真，曼聯同紐記今季踢到不知所謂，後者分分鐘要降班，減價就差唔多。另外，有隻叫高路普嘅牛牛俾人攞出嚟慈善拍賣；點解隻牛叫高路普?聽講呢隻牛好似利物浦個後防咁成日有意外，啲人咪攞高路普嚟開玩笑囉。