今年立法會選舉，各個政黨都趁機換班，等上位嘅第二、三梯隊爭崩頭，就連一向欽點接班人嘅民建聯，都話要搞「黨內民主」，之前已講過葉國謙區議會（一）嘅議席會由該黨區議員一人一票互選產生。
該黨決定退下火線嘅九龍東議員陳鑑林（橄欖）話佢嗰區都有個「先行先試」遴選機制，有意參加者再由支部委員同區議員按地區工作、選舉論壇等表現評分，遴選工作已經完成，等4月中央開會通過支部推薦名單就拍板。佢唔肯透露邊個得分最高，不過早前有傳觀塘區議員柯創盛係熱門人選。
橄欖噚日喺入伙唔夠一個月嘅新居搞傳媒新春團拜（圖），佢本來住喺黃大仙沙田坳道丁屋，近月就搬咗去牛池灣峻弦，買入時呎價萬幾蚊，年初二仲有開心大發現，原來佢個單位可以睇到煙花。