昨日是大年初三赤口，沙田馬場舉行「農曆新年賽馬日」，邀得郭富城、鄭少秋（秋官）和麥玲玲出席。城城在台上擺孫悟空甫士，乘機宣傳他主演的賀歲片《西遊記之孫悟空三打白骨精》，之後與現場觀眾玩遊戲，又公開自己貼的心水，希望觀眾贏大錢，至於秋官就獻唱兼與財神派利是，麥玲玲當然與馬迷講流年運程。
城城表示今年賀歲檔好熱鬧，他說：「我部戲開畫兩日，已經收3億幾（中港票房），好滿意。哥哥同姐姐都話好睇，值回票價，拍嗰陣幾辛苦都抵。我自己睇咗3次，媽咪就未睇，因為佢行動唔方便，不過可以遲啲包場睇。」
秋官心痛欣宜辛苦
去年城城集中拍電影，包括《夢想合伙人》、《天亮之前》和《寒戰2》等，而現時拍攝的《新永不消逝的電波》預計3月拍完，問會否接演《西遊記》第3集《女兒國》？他表示：「8月要喺紅館開騷，要睇吓劇本先決定。」今個星期日就是情人節，問城城與女友方媛（Moka）會點過？他笑言：「情人節要工作中過，自己向來唔係好重視，只係重視農曆新年。」不過問他何時成家立室派雙封利是時，城城幽默說：「傷風感冒嗰啲呀？順其自然啦，自己唔急。」
此外，秋官透露新年有和女兒鄭欣宜食飯：「佢最近賣曲奇，啲曲奇好有營養，我都買幾十盒用嚟送禮，支持吓。我仲去咗舖頭幫手，見佢工作好攰，對眼都耷晒，生意咁忙可能越嚟越瘦。」
採訪：張俊銘
攝影：仇志德
