你話普羅馬迷點可以唔當巴西騎師神咁拜，一個莫雷拉已經夠勁揪，再嚟一個蘇兆輝，更加係一時瑜亮。
蘇兆輝首次在港跑賀歲馬，這天一開始頭場已贏告廐「齊齊歡欣」打響猴年頭炮，同時該場氣走雷神座騎「快趣的」攞埋彩，跟手佢於第二場騎「樂家將」再接再厲，跑落贏唔到都有第二。蘇兆輝見好當然唔會收，第五場四班1400米，續策上仗由自己跑第二的苗廐馬「金錢路」，同大熱門由羅理雅策騎的「燈胆大師」鬥足一條直路，兩駒叮噹馬頭，蘇兆輝狂鞭力騎，一直壓住居自己內側的「燈胆大師」寸步不讓，可以話係施展渾身解數，結果就憑佢呢份硬功同勁度，造就「金錢路」影相擊退「燈胆大師」順利補中，單Win及組合獨贏A2，分別派70及19元正，蘇兆輝亦告連勝七期仲未斷纜。
反觀羅理雅雖則用盡全力搏殺，但睇落就似乎唔夠蘇兆輝硬淨，「燈胆大師」輸少少做二奶，人馬都唔可以建功賀歲，次熱「實在威」夥拍田泰安後上跑第三，第四名則落喺罕見的雷神冷馬身上，此乃19倍方廐「好醒」，四重彩派9,189元。