【男潮籽：玩物達人】
提起每年備受注目的NBA全明星賽（All-Star Game） ，相信一眾球迷都能說出幾個經典場面。期間限定波衫，雖然每年只穿一次，但因各有特別設計，而且驚喜不斷，吸引不少球迷力追。2016全明星賽將於本月12至14日舉行，記者找來兩位愛儲波衫的die hard球迷阿鋒及James，點評今季新衫之餘，同時重溫多年All-Star盛況。
「我儲嘅NBA波衫𠵱家大概有160幾件。」阿鋒說，年輕一點的James則較少，「我只有30幾件，前輩。」不過說到All-Star波衫，二人差距不大，畢竟一年只有一次，不像普通波衫般一季都有數個版本，他們均說：「其實要搵指定球員舊時嘅明星賽波衫真係比較難，年份耐啲嘅，見到有款就要買，如果真係要搵指定年份同球星，市面比較少，多數要喺外國網度搵。」原因是全明星賽的時間很短，波衫產量相對較少，而且大多只為最頂級的幾位球星推出球衣，次一級的便很難找。「美國嘅話，或者會有多啲球星俾你揀，亞洲區真係好少，好像我呢件2004年嘅Jason Kidd，一見到就即刻畀錢，諗都唔諗。」阿鋒笑說。至於James，因他多儲近年波衫，而且喜歡的是「大帝」LeBron James，就算要找舊款波衫，也不困難。
最經典！九十年代大Logo
說到NBA全明星賽，原來最早一屆已是1951年，不過說到波衫，九十年代才開始大放異彩，阿鋒尤愛誇張的設計，「九十年代例如速龍、火箭、太陽等，都有好大個logo喺件衫上面，就連全明星賽嘅波衫設計都一樣，我覺得嗰時嘅波衫係最靚嘅！」1991年的那件更是經典中的經典，大大個NBA，再加大大粒星，盡顯古典味道，「其實由1991年開始，至到1994年都用咗差唔多嘅設計，只係換上唔同嘅顏色，當年Magic Johnson、Larry Bird等上一代最強嘅全部喺晒度，可以話係全明星賽最美好嘅年代。」到了1995年及1996年，紫白、綠白的配色，加上滿載地方特色的辣椒及仙人掌logo，亦非常精采，「比較可惜嘅係，由1997年至2002年，全明星賽就冇特別設計嘅波衫，球星只係穿番自己球會波衫，第一年睇係精采嘅，因為好少會睇到唔同嘅波衫同場出現，真係目不暇給，但好快就懷念番之前全明星賽嘅特別版波衫。」
最有意義！08年新奧爾良
2004年才開始看NBA的James，可說是新一代球迷，問到愛LeBron James愛到自己都叫James的他，最喜歡哪件All-Star波衫時，他卻說：「最鍾意2008年嗰件，因為嗰年為咗幫助啱啱俾颶風嚴重破壞嘅新奧爾良，而揀咗喺嗰度舉行，所以覺得特別有意義！」當然，設計特別也是原因之一，可謂前無古人後無來者，波衫前後用上不同顏色，東岸是藍配銀，西岸是白配金，極之搶眼，字體圖案也以富新奧爾良特色的old fashion感覺來設計，新舊兼備，他們說這件球衣至今仍然頗受歡迎。
閒談期間，James突然憶起與全明星賽有關的有趣經歷，「記得有一年全明星賽嗰日有體育堂，點不知落雨，老師竟然帶咗我哋去學校個圖書館睇電視直播！」其實記者當年亦曾於上課時以手提電視偷看比賽，這種難忘回憶，相信一眾球迷總會有吧。
全明星賽經典時刻
新衫低調見心思 亞版隊章較精細
說到2016年全明星賽波衫，adidas早已率先發佈，現貨亦已上架，阿鋒及James也讚不絕口。「我最欣賞佢嘅字體，雖然有人覺得失望，因為冇用番上季嘅落場版繡字，但今年嘅字體復古味極濃，仲係根據1946年NBA第一次喺多倫多舉行球賽嘅波衫嚟設計，配合番今年喺多倫多舉行，相當有意義。」阿鋒說。James則喜歡胸前的楓葉標誌及背面的城市剪影，「兩樣都好有加拿大特色，低調得嚟有心思。」其實領口還有一個多色圖騰，象徵多國共融的理念。
二人又提到，今季全明星賽波衫，亞洲版及美國版都有不同：亞洲版背面獨有球會繡章，楓葉標誌亦由背面移到胸前；美國版的胸前標誌則用上NBA球衣中首見的贊助商標記，可說各具特色，「不過講到靚，我覺得亞洲版嘅隊章精細啲，整體比較靚，但美國版首見贊助商標記，亦值得收藏，所以兩件都會買，哈哈哈！」二人異口同聲。另外，今年亦是Kobe最後一次參戰，他的球衣自然水漲船高，二人亦早已入手，球迷要買就要快啦。
一期一會 2016戰靴列陣
除了波衫，各個品牌也會為旗下球星推出全明星賽特別版波鞋，當年Tracy McGrady一對紅藍鴛鴦鞋更是經典之作！
2016 NBA全明星賽
美國時間2月12至14日
記者：韓繼聰
攝影：鄧鴻欣
編輯：陳國棟
美術：孔文彬