近幾年左丁山一直為咗預防頭頂着涼，引致鼻敏感，經常戴帽，氣溫下降到十度以下，更加要戴帽啦，不過開始善忘，戴住帽去飲茶、食餐，有啲地方係禁止室內戴帽嘅（如FCC），於是除帽，埋單離開時就唔記得咗，如此這般就遺失咗幾頂喼帽。
一位女士唔抵得左丁山啲帽唔夠靚，竟然送咗幾頂佢間公司製造嘅喼帽嚟，但每頂帽上皆有著名品牌或公司標誌，左丁山唔想同人宣傳，多謝女士之後一直都冇戴。幾日前又唔見咗一頂帽嘞，隨手檢視N女士送嚟嘅帽，見到一頂黑色嘅，外形美觀，製作精美，個白色logo好似不常見，起碼左丁山唔識，戴出街唔會代人宣傳啩，於是戴住行去上海總會，點知在南華大廈門口就碰到保險K，佢係去占美廚房嘅，保險K一望就問：「乜你咁時髦呀，呢頂帽依家在三藩市灣區幾流行噃，我個仔啱啱寄咗一頂畀我。」係？究竟係乜牌子呀？保險K話：「枉你成日睇NBA，最紅球隊之MVP，最紅球星史提芬居里（簡寫係Steph Curry）就係由呢隻UA牌子贊助球鞋嘅，居里紅到發紫，故此帶挈呢隻牌子爆紅，營業額與公司股價大幅度上升呀。」
又真係懵，仲以為N牌與A牌已經壟斷晒所有大球星嘅贊助㖭，誰不知兩大牌子走漏了眼，在居里未成名之前，冇將佢收歸旗下，可見大財團嘅球探未必一定啱。金州勇士隊現時嘅三大支柱居里、湯遜，與格連並非NBA選秀時嘅狀元人物，格連更係2012年第35選，但格連竟然係NBA今季三雙王，而今季NBA就有五六個被人看扁咗嘅球員一鳴驚人，成為耀眼球星，可知一個人即使係「寒門出身」，只要自己有真材實料，肯苦拚，一旦時來運到，便會飛上枝頭變鳳凰。
記得居里係與林書豪（哈佛出身）在2010同在金州勇士隊做控球後衞，教練選居里為正選，林書豪為後備，好少機會出場，林書豪唯有出走，點知在紐約爆紅，引起一陣Linsanity狂熱，紐約朋友立即搶購一件Linsanity球衣寄畀左丁山。哎，林瘋只是曇花一現，今天成就與居里相差太遠了，證明金州勇士揀人好有眼光，林書豪之仍然有價值，恐怕是NBA亟需一個黃面孔打開中國市場之故。呢日睇NBA，竟見賀年廣告有居里、林書豪、夏登三人講普通話賀年，就係咁解囉！