今日係猴年第一個交易日，金股齊開市，港交所（388）不嬲都大陣仗，今年循例有主席周松崗、行政總裁李小加、證監會主席唐家成，仲有財經事務及庫務局局長陳家強，一齊主持開市儀式。
舊年陳家強局長去咗金銀業貿易場主持開市儀式，今年選擇去交易所，可能係見2016年一開始，環球股市跌到啪啪聲，過去幾日香港放農曆新年假，外圍又跌，今日恒指閒閒哋要跌一千幾百點，佢去埋交易所派利是，打氣助威或者都係好事嘅。
另一邊廂，金銀業貿易場亦係今朝開市，9點正式開市，陳家強今年就派出副局長劉怡翔去主持大局，同時仲會頒發2014/15年十大最活躍倫敦金銀交易商大獎㖭！