喺去年三月因為同15歲少女發生性行為而被捕嘅新特蘭中場阿當莊臣，大年初三喺女友弗蘭德斯陪同下出庭受審，預計要審兩周。呢位曾代表英格蘭國家隊出賽12次嘅28歲翼鋒，本身被控四條罪，但佢只係認咗兩條，分別係同兒童發生性行為（包括親暱行為）同埋性誘，佢更話只係咀過個女仔；至於其餘兩項同16歲以下少女發生性行為，佢就唔認罪。英國傳媒報道，阿當莊臣原本否認四條控罪，不過去到最後一刻決定認兩條。家陣佢承認自己衰十一，除咗面臨最高14年嘅牢獄之災之外，幾乎肯定會俾黑貓炒魷魚，可以話係前途盡毀。