正所謂好頭好尾，勇士喺大年初二主場出擊鬥火箭，上演猴年首戰，兩軍都着上印咗中文字嘅賀年版波衫比賽，結果勇士憑史堤芬居里（Stephen Curry）轟入35分，以123:110打響猴年頭炮之餘，跨季主場連勝走勢仲增至42場，力逼公牛王朝嘅44場紀錄。
NBA嘅關公手段真係醒，每逢聖誕、新年呢啲大時大節都安排大戰。中國籃球市場咁龐大，周二自然有好多強勁戲碼，其中勇士對火箭就係上季西岸決賽翻版，亦係兩大得分能手居里同火箭後衞夏登（James Harden）嘅交鋒。勇士開季至今主場都未輸過，居里一開波就着晒火，第一節三分六投五中，獨取19分下幫勇士領先42:27。雖然佢哋高興得太早，第三節一度俾火箭反超前74:69；但王者始終係王者，勇士第四節有H班尼斯（Harrison Barnes）獨取17分，幫球隊建立番雙位數優勢，最終大勝13分，保持主場長勝。
跨季主場42連勝力追公牛
打埋今場，勇士到三月先會再次主場出擊，能唔能夠破公牛95/96年嘅紀錄仲要一段時間先知，但居里對目前走勢就仲未滿意，話以今場為例，球隊未有保持48分鐘都高度集中，咁有要求都真係好事。