今年情人節遇上初七人日，無論愛侶還是親朋，其實都可送花予以祝福。聖雅各福群會就首次利用樹葉製作玫瑰花（左圖），佢哋去年底開始遊走各處收集落葉，經漂染後製成紅色及粉紅色嘅玫瑰花瓣，再經庇護工場復康會員作後期加工（右圖），製成「葉瓣玫瑰」義賣。
今年義賣主題為「雨中情緣」，象徵愛侶經歷風雨後，開花結果；禮盒設計為雨傘造型，寓意為身邊伴侶及弱勢社群遮風擋雨。每支「葉瓣玫瑰」義賣68蚊，扣除成本收益都撥歸慈善扶助基層，包括為基層學童提供學習援助、為貧困長期病患者提供藥物支援等。義賣由即日起至本月14日，喺全港20多處地點售賣。詳情可致電28313232。