中環朋友最近都話要去飲茶食晏，事關新開咗幾間賣可愛公仔或別緻點心嘅中菜館，其中一間叫Yum Cha，近上環與尖沙嘴各有一店，一入門口就覺特別，基本上係西餐廳裝潢，廚房屬於開放式，設有bar枱位，感覺上有少少似位於銅鑼灣嘅法國餐廳Seasons。
坐低亦有開心大發現，枱面上有幾包包裝極似避孕套嘅濕紙巾，未用已經笑咗出嚟，即時想起「食色性也」，成件事變得好合理、好過癮。
至於食物，呢度有幾款造型特別嘅點心，好似一道鳳梨酥（3件59元），3隻小鳥放入鳥籠，可愛到唔捨得食，一定要俾相機食先，難得呢款點心並非虛有其表，外層鬆化。而豬樣叉燒包「一籠八戒」（3件49元）與眼睛奶黃包「睇住流奶」（3件49元）亦都係食得兼睇得。
咁呢類賣樣又賣料嘅食肆，價錢當然唔會十分大眾化喇。兩人食晏，埋單大概要500元，一試無妨，但係老實講，呢個價錢，去福臨門簡單都食到餐晏仔。
