巴塞隆拿前鋒美斯同皇家馬德里前鋒基斯坦奴朗拿度（C朗），球場上鬥多波入、鬥多獎盃，球場外亦都鬥餐懵，兩人分別代言唔同體育品牌，廣告戰成日交手，點知連名車拍賣會都交手，不過今次又係美斯贏：據報美斯成功以3,210萬歐元（約2.8億港元）買入一架古董法拉利，可能係世界上最貴嘅跑車㖭。
唔好話我求大俠憎人富貴厭人貧，法拉利喺香港一街都係，點解美斯bid贏嘅法拉利差不多值成三億港元咁巴閉？原來呢部法拉利335S開蓬版大有來頭，喺1957年出廠，1958年出戰古巴格蘭披治賽，由英國傳奇車手摩斯駕駛下贏出呢場比賽。
呢架名車由意大利富商阿歷山度普圖擁有，一直保存得好好，上星期普圖就拎去巴黎艾德汽車拍賣會進行競投，底價2,000萬歐元。經過一大輪競價，最後由一位匿名買家投得，拍賣行點都唔肯講買家身份，不過普圖團隊就向西班牙傳媒放料，話買家就係美斯，而且C朗都有出過價，不過最終打退堂鼓。
美斯豪擲半年人工
以《法國足球雜誌》估計，美斯上年收入係5.5億港元，用超過半年人工去買心頭好，我求大俠除咗葡萄外，只可講句「有錢就是任性」。
不過咁，有錢之餘，仲要身體健康，咁先至活得精采，巴塞隆拿周中出戰西班牙盃準決賽次回合，作客華倫西亞嘅比賽，美斯唔使出戰之餘仲做埋小手術。周二美斯就去巴塞當地醫院接受激光去腎石手術，原來上年12月世冠盃期間美斯已經驗出有腎石問題，亦都忍痛比賽。今次嘅手術快靚正，美斯上晝入院，下晝已經可以出院返屋企休息，下周日對切爾達嗰場西甲嘅比賽亦都可以順利復出。
C朗踢埋2022卡塔爾世盃
講開C朗，上星期五就係佢31歲生日，買唔到架古董法拉利做自己生日禮物，真係嬲嬲豬，好彩冇影響佢對足球嘅熱誠。
呢位葡萄牙國家隊隊長日前接受訪問時豪言，2022年卡塔爾世界盃會係佢最後一次踢世界盃，仲話自己成日去卡塔爾同杜拜度假，能夠喺呢度完成最後一次國際大賽就完美。不過成六年後嘅事，C朗到時已經37歲，仲夠唔夠體力帶葡萄牙打出好成績呢？