近日市場有一項異動需要留意下。日本宣佈實行負利率後，日圓貶值，日經指數回升，好正路，但都係得幾日貨仔。美元兌日圓見121後已跌回116附近，日經指數亦跌穿負利率當日急升的起步位，16600點都穿埋。市場反應用五個字概括，就係覺得「央行冇料到」。
問題不在於日本實行負利率，而係市場覺得央行冇料到，如果問題持續，可能係今年第一隻黑天鵝，因為控場者失去左右市場能力，則市場要再平衡去搵新秩序。2008年金融海嘯後，市場已習慣央行主導一切，央行話要升就升，央行話要止跌就止跌。於是所有人都去捕捉、盤算央行下一步想點，希望捷足先登。黑天鵝往往要人估佢唔到先嚟料，若往後繼續呈現市場之力大於央行之力，即市場走向同央行引導嘅方向背道而馳，意味要進入一段混亂期。
其實美國好驚出現央行冇料到情況。QE一個後遺症係市場錢太多，多到一個地步，係游資如脫韁野馬，央行都管唔掂啲錢。美國停QE後一路拖住唔加息，並不斷試行隔夜逆回購（Overnight Reverse Repurchase Agreement，ON RRP），因為聯儲局發現加息後市場可能會唔跟。
金融海嘯後全世界QE，大量銀紙浸到上心口，舊有嘅貨幣政策管唔到啲錢，呢種情況本來只出現喺銀行制度落後地方，例如中國便曾出現減息但市場利率不跌反升。但聯儲局發現QE後美國可能都會發生同樣情況，主要原因係QE後影子銀行湧現令央行貨幣政策嘅傳導性失效。所以2013年末聯儲局開始試ON RPP，由唔同期限、唔同規模、唔同利率反反覆覆去試，試到聯儲局認為ON RPP可以作為聯邦基金利率下限，確保加息後市場會同步跟。
加息後市場唔跟，同負利率後市場覺得冇料到係同一件事的一體兩面，都係市場預期央行貨幣政策嘅傳導性失效。原本的秩序係市場以央行貨幣政策為定錨，各國央行再以美國聯儲局貨幣政策為定錨，期間市場雖有上落，但總體上係處於一套固定嘅金融系統內運行。若QE後遺症觸發呢套金融系統失序，會引發乜嘢問題無法估算。
歐洲又QE又負利率仍然夾唔起通脹，嚟緊3月好大機會加大QE規模；美國今年要加3至4次息的話，3月打後市場將聚焦其加息步伐。若3月歐洲落實加大QE規模，歐元同樣略貶幾日即反手轉強，歐洲股市升幾日就打回原型；而美國喺加息問題上再次咦咦哦哦，講埋啲唔排除會加但又唔一定加嘅廢話，市場覺得央行冇料到嘅預期將進一步加強，則投資者所適應近年來凡經濟出事等央行打救的習慣，係時候要改變一下。
Mr. Tregunter