迪比呢個衰仔，踢預備組先識生性！喺星期日場英超搞到曼聯三分變一分嘅迪比，星期一被領隊雲高爾貶落預備組踢U21，即刻交出三次助攻，幫紅魔以7:0大勝諾域治。唔知迪比呢位「負皮王」可唔可以及時挽回雲帥同球迷對佢嘅信任呢？
上場對車路士，迪比後備入替毫無建樹，打唔成反擊之餘，仲因為佢嘅失誤，搞到臨尾失波而被逼和1:1，曼聯就咁冇咗兩分。網上啲魔迷插到迪比飛起，而雲高爾似乎都唔滿意，踢佢落預備組反省吓。
踢預備組貢獻三助攻
雖然迪比喺星期日先落過場，但喺翌日對諾域治U21嘅比賽，佢同贊奴沙、韋爾堅尼、安達斯彭利拿等踢正選；而雲帥亦有入場睇波，似乎想睇吓迪比會唔會生性。可能知恥近乎勇，呢位荷蘭國腳呢場交出三次助攻，如果上場有咁嘅表現咪好囉！
其實，隊長朗尼都有幫迪比減吓壓：「迪比係個出色嘅球員，但人人都會有錯，我都傳過啲好差嘅波，同埋由失去控球到失波之間發生咗好多事，唔能夠怪晒迪比。」隊長咁睇你，迪比你之後唔好再辜負大家期望嘞！曼聯呢場大勝諾域治7:0，韋爾堅尼入咗五球，希望雲高爾之後都畀多啲機會呢位前鋒小將啦！雖然大炒一場，迪比又生性咗，但都有壞消息㗎，翼鋒贊奴沙同右閘古利姆華利拿都喺呢場傷出，未知佢哋傷勢係點。
傳撬普捷天奴股價即跌
另外，我求大俠知有啲曼聯球迷都會喺美國買少少球會股票，撐吓愛隊，但呢排全球股市插水，紅魔股價都不能倖免，隨大市狂跌。喺年初一嘅美股，曼聯一度跌穿14蚊美元大關，好在之後有買盤支持，升番上14.1美元收市，但都創咗近三年嘅新低。咁啱前兩日有傳曼聯想搵熱刺領隊普捷天奴下季接手，唔通市場對普帥冇乜信心？總之都希望紅魔嘅股價好似迪比咁，識得生生性性咁止跌回升啦！德國《圖片報》亦都爆料，話曼聯中場舒韋恩史迪加會同女友、網球手伊娃諾域喺下個月拉埋天窗，唔知又會唔會幫到球隊沖喜吓呢？