每逢過年，香港必然樂得清靜，乜唔係啫，幾十萬人同時離開香港出外度假，彌敦道都冇塞車啦。香港人最熱衷於出外旅行，左丁山本來也想在年初八前到鹿兒島浸溫泉，但機票一早冇晒，想住嗰間酒店又滿到瀉，只得作罷，更不消提機票酒店房間價突然之間急升咯。一月中曾問過自航空界退休、轉行到中環返工嘅校友H：「乜啲機票咁鬼貴㗎？」校友H呵呵大笑：「何止農曆年呀，復活節咪又係一樣！航空公司唔在呢兩個黃金檔期賺吓錢，搵邊個可憐？梗係有咁貴收得咁貴嘅啦！」
航空公司有航空公司道理，我有我的算盤，正是你進我縮，留番閒日先至去囉，明天年初三入馬場都係一個好節目啫。
普通人就可如此，旅遊界中人就好着急黃金檔期有冇人出外旅遊以及來港遊客有無增長。例如旅發局總裁劉鎮漢對此就非常上心。旅發局初步數字估計，2015年整體訪港旅客人次會超過5千9百30萬人，跌2.5%，內地客跌2.9%，非內地客跌1.2%，內地客下跌主要理由係人民幣兌港元貶值，及「一簽多行」由「一周一行」逐漸代替。到今年四月，「一簽多行」全部到期失效，「一周一行」嘅直接後果係水貨客大量減少，我地去新城市廣場行嗰條「金飾珠寶巷」，就經常與店員互相對望，因入面冇一個內地客也！此外，「一周一行」限制咗一啲趁高興就飛嚟香港嘅高檔客，佢地必須等到下一個星期才再來港，興之所至就不如由上海直飛大阪吃喝血拼咯；預料今年四月後，內地遊客來港會進一步減少！有乜辦法挽回頹勢呢？過年前同旅發局劉鎮漢傾過，佢話旅發局要集中資源吸引來港過夜旅客，集中在20個主要市場宣傳推廣，即是海外（台灣、日本、南韓、東南亞、印度、美國）市場共佔遊客74%，其他9個市場（26%）。過夜旅客多數係來港兩夜三日、三夜四日之類，好少留港五至七日嘅，旅發局研究發現遊客有四大類別：（一）全面玩家（maximisers），來自新興國家及內地二三線城市，一來港就要在三四日之內玩到盡；（二）時尚旅客（trend hunters），來自內地大城市及短途市場，喜歡發現香港新潮流；（三）家庭旅客（family），來自內地、東南亞、印度，必遊迪士尼及海洋公園；（四）cultural explorers（文化旅客），來自日本韓國及長途市場，尋找道地香港文化。旅發局又分得幾仔細噃，讀者諸君去日本旅行，又屬於邊一類呢？