【本報訊】樂做肉類分割技術員的，還有32歲的田景錄（Ivan）。2008年港大化學系畢業，在吉之島做Management Trainee（管理實習生，MT），頭3個月到不同部門了解運作，3個月後，獲派「豬肉佬」工作，他不諱言慘叫一聲。「最多人揀零食雜貨部門，豬肉檔冇人肯揀，日式超市trainee都要由低做起，着住制服企豬肉枱，頭一個月，連切豬肉都冇機會做，因為唔識切，落錯刀好嘥，主力包保鮮紙！」
遭師奶當反面教材
豬肉檔制服無型又無格，那頂透明浴帽最致命，lvan直言最怕超市巧遇大學同學，但最傷一次，要數後巷掉紙皮箱一幕。「真係好似做戲咁，有嗰師奶同個女講，你唔讀書，第時就好似呢個哥哥咁」。大學生慘成反面教材，他百辭莫辯。
半年後，培訓部更邀請他將分割豬肉技術規範化。「嗰時成個部門最後生係我，聯絡咗澳洲肉類畜牧肉食協會，搵咗個師傅嚟香港教，跟澳洲行5級制，肉枱師父都要接受考核，取得認可資格」。lvan說：「好開心終於見到街市業界開新課程，呢行其實好專業，只係以前成日俾人睇小」。
這位肉類分割技術員並非浪得虛名，由煲湯豬肉的不同選擇，到不同級數的和牛及穀飼牛，以至刁鑽的肉眼頂、豬肋蓋柳，統統走不出他的法眼。「煲湯可以用瘦肉，想食埋嚿豬肉唔好嘥，就揀西施骨，再唔係就揀豬𦟌同豬筒骨」。這個新晉肉類專家，至今更榮升老闆賣肉。Ivan一年多前與肉類供應商好友Vincent侯振峰拍檔創業，將工作多年儲下的買樓首期統統押注，在工廠大廈開設肉類工場，又設門市賣刁鑽靚肉。
■記者呂麗嬋