華倫西亞(橙衫)自從由加利尼維利(小圖)接手後表現冇起色,淨識喺盃賽贏波;而喺年廿九嘅聯賽,華倫作客又以0:1不敵貝迪斯,加利佬上任以嚟聯賽五和四負,同降班區得番四分距離,所以外界普遍認為西甲猴年第一炒非佢莫屬。由於華倫班主係新加坡商人林榮福,應該唔會新正頭就將加利佬落鑊;不過,亦有指正因林榮福係華人,所以會喺初三赤口炒加利佬嚟「應節」喎!
至於同日西甲皇家馬德里作客CF格蘭納達,就憑莫迪歷喺完場前五分鐘嘅入球贏2:1;值得一提係開波之前,格蘭納達請嚟屈福特前鋒恩哈路做嘉賓,仲送咗件七號波衫畀佢㖭!因為恩哈路效力烏甸尼斯期間,曾經喺2009/10球季同2011至14年外借去格蘭納達,表現仲唔錯㖭。