每年農曆大年初三，沙田馬場都有賽事上演，咁嚟緊丙申猴年，當然亦唔會例外，當日嘅重頭戲，係一班1400米賀年盃，但大家唔好以為賀歲賽，就只有跑馬，當日其實仲有好多節目，首先一入場，就會送你一支「勝利筆」，亦都派抽獎卡，揭中可獲24K包金駿馬擺設；而靚聲王鄭少秋，會喺馬匹亮相圈大唱賀年歌，另一位偶像級人物郭富城，當日亦會大派利是，以及送出由佢主演嘅《西遊記之孫悟空三打白骨精》戲飛。
想發個新年財，最好就刀仔鋸大樹投注三T，當日如果一注獨中，三T彩金將高達2800萬；就提醒大家，丙申猴年大年初三，最有利係米、白、黃三種顏色，方型圓案會係行運，如果見到馬匹綵衣有上述特徵，可以睇好一線，初三旺門數字就係2、6、9，場場買269號馬匹鐵三角Q，話唔定有斬獲，最理想就係上午11時前入到馬場，並霸定個東面靚位，就食正吉時同吉位喎！
馬名最好吼實一啲有「金」及「土」字的馬，好似「金錢路」就會喺初三上陣，而屬狗的騎師潘頓，以及屬雞的練馬師高伯新亦可睇高一線。